Ашлык Башкортстанга ага
Урып-җыю
Уракка төшкәч, беренче сугылган ашлыкны кабул итү тантаналары гадәттә элеватор янында үтә. Ә менә Актаныш районы күмәк хуҗалыкларыннан килгән тәүге автомобильләр олавы хакимият бинасы янына җыелды быел. Чөнки күптән түгел районга кергән инвестор белән аңлашылмаучанлык килеп чыгуы сәбәпле, Актаныш элеваторына ( инде ул – яңа хуҗалар милке) район кырларында җыеп алынган быелгы уңышны кабул итү буенча килешүгә ирешә алмаганнар якташлар. Нәтиҗәдә, Актаныш игенчесе ел дәвамында тир түгеп үстергән хезмәт җимешен Башкортстанның Илеш районындагы Андреевка һәм Бакалы элеваторларына сатарга мәҗбүр.
Әлбәттә, тантана вакытында янымда басып торучы бер хуҗалык рәисенең: "Башкортстан икмәккә тиенә болай булгач. Әмма Бакалы тикле Бакалыга ашлык ташу, һай, кыйммәткә төшәчәк безгә", – дип уфтануын аңларга була анысы. Якын арамы әллә? Ягулыкка бәяләр көнләп үскән заман лабаса. Борын төбендәге үз элеваторыңа һәр елдагыча ашлыгыңны салу бәхетеннән мәхрүм калу кемнең кәефен кырмас? Һәрхәлдә, бернинди кысаларга сыймаучы бу хәлдән биредә җыелган халыкның йөзе бик моңсу булып тоелды миңа. Яңгырап торган моңлы җырлар да, дәртле биюләр дә һичкемнең күңелен күтәрә алмады төсле.
Югыйсә район игенчеләре гаҗәеп мул иген үстергәннәр бу җәйдә. Максатлары – соңгы еллардагы сыман, республика күләмендә беренче өчлеккә керү белән чикләнеп калмыйча, алдынгылыкны яулау. Әлегә һәр гектардан алган уңышлары – 45,1 центнер. Нурлатныкылар күрсәткеченнән төгәл бер центнерга күбрәк бу. Икенче "көндәш"ләре – Буа уңганнары исә һәр гектардан 42,4 центнер суктыра.
– Уракка ныклап әзерләнеп чыктык. Ашлык суктыруда эшләячәк 131 комбайнның 17 се – чит илнеке. Игенчелек тармагы тулысыча техника белән тәэмин ителгән бездә. Быел хуҗалыклар 140 млн сумлык кредит алдылар. Аларның барысы да үз көнен үзе күрерлек. Беренче сугылган гектарлардан чыгып нәтиҗә ясаганда, тулаем уңыш былтыргысыннан шактый югары булмакчы, – ди район хуҗасы Энгель Фәттахов.
Беренче ашлык олавы Башкортстан тарафларына юл алды, ә халык район үзәгендә ачылачак икенче мәчет нигезенә таш салу тантанасына ашыкты. Әнә шулай, бер көндә – ике зур, мөһим вакыйга. Һич тә бер-берсеннән аерып карарлык түгел. Кыскасы, иман белән башланган изге эшнең уңышлы тәмамланасына саллы ишарә.
Рәис ЗАРИПОВ
|